Lukashenko: prezident vertolyotiga hujum urushga olib keladi.

Belarus prezidenti Aleksandr Lukashenko Pinsk oblastiga vertolyotda safar qildi. Uning so‘zlariga ko‘ra, parvoz chog‘ida Belarus havo hududida uchuvchisiz samolyotlar kuzatilgan. Biroq, Lukashenko bundan xavotir olmaganini aytdi.

«Bu mening muammolarim emas, bu xavfsizlik xizmatining muammolari. Ular dronlar qayerga uchishi va prezident vertolyoti qayerga uchishi kerakligini kuzatadi. Men bunga shunday munosabat bildiraman», dedi Aleksandr Lukashenko, ammo dronlar qaysi davlatga tegishli ekaniga aniqlik kiritmadi.

Belarus prezidentining qo‘shimcha qilishicha, uning Pinsk oblastiga parvozi bir soatga kechiktirilgan, biroq bunga ob-havo sharoiti sabab bo‘lgan. U dronlar g‘ayrioddiy tarzda past uchganini ta’kidlab, parvozga xalaqit bermaganini aytdi.

«Men bundan unchalik tashvishlanmayman. Keyin bilasizmi, prezident vertolyotini urib tushirish — bu urush. Bu ukrainaliklarga kerak emas», dedi u.

5 sentabrga o‘tar kechasi Belarus Mudofaa vazirligi mamlakat havo hududida bir nechta uchuvchisiz samolyotlar borligi haqida xabar berdi. Barcha dronlar urib tushirildi. Ulardan birining qulashi Gomeldagi g‘isht omborida yong‘inga olib keldi. Hech kim jabrlanmadi. Vazirlik urib tushirilgan uchuvchisiz samolyotlar qaysi davlatga tegishli ekanligini aniqlamadi. Avgust oyida Aleksandr Lukashenko Ukraina Qurolli kuchlarining bir necha dronlari mamlakat osmonida urib tushirilganini aytgan edi. U Ukraina rasmiylarini provokatsiya va kelishuvlarni buzishda aybladi.