DW o‘zining arab tahririyati muxbiriga qilingan hujumni qoraladi.

Foto: M. Becker/dpa/picture alliance

Germaniyaning Deutsche Welle (DW) media kompaniyasi 12 oktyabr, shanbaga o‘tar kechasi o‘zining arab tahririyati bo‘limi muxbiri Adonis Alhaled bilan yuz bergan «jirkanch zo‘ravonlik harakatini» qoraladi. Bu haqda 13 oktyabr, yakshanba kuni chop etilgan DW press-relizida aytiladi.

Adonis Alhaledning so‘zlariga ko‘ra, u va hamkasbi Dyusseldorfdagi Mitsubishi Electric konsert maydonida suriyalik musiqachi Al Shami bilan suhbatni yozib olishganidan so‘ng xavfsizlik tizimidan tahdid va haqoratlarga uchragan. Xususan, qo‘riqchilar Alhaled va uning hamkasbini haqoratli va behayo so‘zlar bilan so‘kkan, shundan so‘ng, jurnalistning so‘zlariga ko‘ra, ular uni intervyu maydonidan hovliga itarib yuborishgan. Soqchilardan biri DW muxbirini bir necha marta urgan.

Adonis Alhaled tez yordam bo‘linmasiga olib ketildi. 12 oktyabr, shanba kuni ertalab u kasalxonadan chiqib, jinoiy ish qo‘zg‘atishga ariza bergan. Dyusseldorf politsiyasi o‘sha kuni kechqurun tergov boshladi. Hodisaning videoyozuvlari «saqlanadi va o‘rganiladi», deb xabar berdi DW.

DW bosh direktori Piter Limburg Adonis Alhaledga qilingan hujumni keskin qoralashini aytdi. «Bu jinoyat nafaqat jirkanch zo‘ravonlik harakati, balki matbuot erkinligiga hujumdir. Jinoyatchilar qonunning to‘liq kuchiga duch kelishlari kerak», dedi u va «barcha DW xodimlarining birdamligi» haqida ma’lum qildi. U, shuningdek, artist Al Shamini «bu harakatdan uzoqlashishga» chaqirdi.